كېيىنكى كۈنلەردە دۇنيادىكى ھەرقايسى ئەللەر پۈتۈن كۈچى بىلەن قايتا قۇرۇش خىزمىتىنى باشلىۋەتتى، جۇڭگونىڭ سۈنئىي بىرىكمە يېمەكلىكى بۇ جەھەتتە چوڭ رول ئوينىدى دېيىشكە بولىدۇ، دۇنيانىڭ ھەرقايسى جايلىرىدا ئىلگىرىكىدەك ئاپەتتىن كېيىنكى ئاشلىق كەمچىل بولۇش مەسىلىسى كۆرۈلمىدى. جۇڭگو، روسىيە، ئامېرىكا ئۈچ دۆلەتتىن كېيىن، فرانسىيە، ئەنگلىيە قاتارلىق غەرپ دۆلەتلىرىنىڭمۇ ئالەم كېمىسى مۇۋەپپەقىيەتلىك قويۇپ بېرىلدى.
ئاسىيا رايونىدا دېڭىز قىرغىقىغا يېقىنراق جايلاشقان ۋېيتنام، كورىيە، ياپونىيە، فىلىپپىن ھەمدە جۇڭگونىڭ ئۇچرىغان زىيىنى كۆپرەك بولدى، ئۇنىڭ ئىچىدە ياپونىيە پۈتۈنلەي دېگۈدەك يوقىلىپ كەتتى. جۇڭگونىڭ دۆلەت رەئىسى لى شياڭ بۇ بىر نەچچە كۈندىن بېرى ھەرقايسى قايتا قۇرۇش رايونلىرىنى كۆزدىن كەچۈرۈش بىلەن ئالدىراش بولۇپ كەتتى. شياڭگاڭ ــ ئىلگىرى مال سېتىۋېلىش جەننىتى دەپ ئاتالغان شەھەر ــ ھازىر بىر پارچە ئىپتىدائىي ئورمانلىققا ئايلانغان ئىدى. ئورمانلىق ئارىسىدا قەد كۆتۈرۈپ تۇرغان ۋەيران بولغان بىنالارلا بۇ يەرنىڭ ئىلگىرى گۈللەنگەن چوڭ بىر شەھەر ئىكەنلىكىدىن دېرەك بېرىپ تۇراتتى.

ــ ۋەن شيوڭفېي!ــ ئالاقىچى بىردەم ئويلىنىپ تۇرۇپ، بىردىنلا ھەيرانلىقتىن توۋلىۋەتتى،ــ ئۇلار… ئۇلار قۇربان بولغانتىغۇ؟
بازا قوماندانى يۆچېڭلوڭ خەۋەرنى ئاڭلاپلا قوماندانلىق ئۆيىگە دەرھال يۈگۈرۈپ كىرىپ، مىكروفوننى ئېلىپ دېدى:
ــ مەن جۇڭخۇا خەلق جۇمھۇرىيىتى شىنجاڭ يەرئاستى بازىسىنىڭ قوماندانى يۆچېڭلوڭ، بىز ئاڭلىدۇق!
ۋاقىتلىق جىمجىتلىقتىن كېيىن، چاقىرغۇدىن ئاۋاز كەلدى:
ــ مەن جۇڭگو ئالاھىدە قىسمى 23-تارماق ئەترىتىدىن ۋەن شيوڭفېي، مەن ئامېرىكا ئالاھىدە قىسمىدىن ۋىتىك ۋە فرانسىيىدىن ئاندىرىۋلار بىلەن بىللە تاشقى پىلانېتلىقلارنىڭ بىر كىچىك تىپتىكى قوغدىغۇچى كېمىسىدە، بىز بازىغا قونماقچى، بىزگە ئورۇن بوشىتىپ بەرسەڭلار!
يۆچېڭلوڭ ھاياجانلانغان ھالدا:
ــ بولىدۇ، مەن دەرھال قىسىم ئاجرىتىپ سىلەرنى كۈتۈۋالىمەن،ــ دېدى-دە، قولدىكى چاقىرغۇنى قويۇپ،ــ شياۋجاڭ، دەرھال مەركەز بىلەن ئالاقىلەشكىن،ــ دېدى.