ئىككىنچى كۈنى ئەتىگەندىلا بۇ بىر توپ لۈكچەكلەر ئەسكەرلەر تەرىپىدىن ئاي شارىغا ساياھەتكە ئاپىرىدىغان «مەخسۇس ئۇچقۇ»غا يالاپ چىقىرىلدى!
ــ توختاپ تۇرۇڭلار! مەن ئادۋوكات چاقىرىمەن، سىلەر بۇنداق قىلساڭلار بولمايدۇ!
ــ مېنى قويۇۋېتىڭلار، سىلەرنىڭ بۇنداق قىلغىنىڭلار خەلقنى باستۇرغانلىق، كىشىلىك ھوقۇققا دەخلى قىلغانلىق!
ــ مەن ئاي شارىغا بارمايمەن، قۇتقۇزۇڭلار!
ــ ئـانـاڭـنـى! قالايمىقان مىدىراشماي چىقىشە!ــ بىر توپ ئەسكەر بۇ بىر توپ ئادەمنى دۈشكەللەپ تارتىپ مەخسۇس ئۇچقۇغا چىقىرىپ، ئورۇندۇققا باغلىدى، يالاپ ماڭغۇچىلارنىڭ ئەترەت باشلىقى تېخىغىچە ۋاقىراپ-جاقىراپ غەلۋە قىلىۋاتقان بۇ بىر توپ ئادەمگە قاتتىق ۋاقىرىدى:
ــ ئاغزىڭنى يۇمۇش! ئەگەر كىمدىكىم يەنە زۇۋانىنى چىقىرىدىغان بولسا، مەن ئۇنى ئالەم بوشلۇقىغا تاشلىۋېتىمەن!
بۇنىڭ بىلەن ئۇچقۇ بۆلمىسى دەرھال تېنچلاندى.

بۇ گەپنى ئاڭلاپ ۋەن شيوڭفېي دەماللىققا نېمە دېيىشىنى بىلەلمەي قالدى. ئىككىيلەن چوڭقۇر سۈكۈتكە چۆمدى.
ــ جاراھەت ساقايسا ئاغرىقنى ئۇنتۇيدىغان ماددىي مەنپەئەتنىڭ قۇللىرى! ئادەملەر تېنچ تۇرمۇشقا ئادەتلەنسىلا ھامان مۇشۇنداق ئادەملەر پەيدا بولىدۇ،ــ دېدى لىن خەييۈن،ــ دۆلەت بىلەن دۆلەت ئوتتۇرىسىدىمۇ مۇشۇنداق، 2-جاھان ئۇرۇشى مەزگىلىدىمۇ مۇشۇنداقتى، تېنچ ئوكيان ئۇرۇشىدا ئامېرىكا ياپونىيىنى چەكلەش ئۈچۈن جۇڭگوغا نۇرغۇن ماددىي ئەشيا ياردىمى بەرگەن ئىدى! بىراق ئۇرۇش ئاياقلاشقاندىن كېيىن ئامېرىكا بىلەن ياپونىيە ئىستىراتىگېيىلىك ھەمراھلاردىن بولۇپ قالدى، جۇڭگو بولسا جازالاش ئوبيېكتىغا ئايلاندى، ئەمما ئامېرىكا ياپونىيىنىڭ باكتېرىيە قوراللىرى ئىچىدە مەخسۇس ئۇلارغا تاقابىل تۇرۇشقا تەتقىق قىلىپ ياسالغانلىرىنىڭمۇ بارلىقىنى خىيالىغىمۇ كەلتۈرمىگەن.

لىن خەييۈن ئالاقزادىلىككە چۆمگەن قىزچاققا قاراپ ساپ ۋېيتنام تىلىدا:
ــ قورقماڭ، سىزگە نېمە بولدى؟ــ دەپ سورىدى. ھېلىقى قىزچاق بېشىنى كۆتۈرۈپ ئالاقزادىلىك بىلەن:
ــ ماڭا ياردەم قىلىڭ… بىر توپ لۈكچەكلەر مېنى ئۆزلىرىگە ھەمراھ بولۇپ ئويناشقا مەجبۇرلاۋاتىدۇ!!ــ دېدى. ئۇنىڭ سۆزى تۈگەپ تۇرۇشىغا، چاچلىرىنى كونگونىڭ شاتۇتىلىرىدەك بويىۋالغان، غەلىتە ياسانغان بىر توپ ئادەم كىشىلەر توپىدىن سۇغۇرۇلۇپ چىقىپ كېلىشتى، ھېلىقى قىزچاق بۇلارنى كۆرۈپ دەرھال لىن خەييۈننىڭ كەينىگە مۆكۈنۈپ، قورققان ھالدا ئۇ ئادەملەرگە قاراپ تۇردى. ئۇلارنىڭ ئىچىدىكى چېچىنى سېرىق بويىۋالغان، ئاتامىنىغا ئوخشايدىغان بىرى مېڭىپ كېلىپ ھېلىقى قىزچاقنىڭ لىن خەييۈننىڭ كەينىگە مۆكۈنۈۋالغىنىنى كۆرۈپ، لىن خەييۈنگە شەھۋەتلىك نەزەردە بىر قارىۋەتكەندىن كېيىن:
ــ خېنىم، دوستلىرىڭىز بىلەن كوچا ئايلاندىڭىزمۇ؟ بولمىسا بىز بىلەن بىللە ئويناپ كېلىڭ!ــ دېدى. كەينىدىكىلەر بۇنى ئاڭلاپ شەھۋەتلىك كۈلۈپ كېتىشتى. بۇنى ئاڭلاپ لىن خەييۈننىڭ يېنىدىكى بىر قىزچاق سېرىق چاچلىقنى كۆرسىتىپ تۇرۇپ ئاچچىقلىغان ھالدا تىللىدى:
ــ نېمە دەۋاتىسەن؟! سېسىق ئاغزىڭنى يۇم!

ۋېيتنام خانوي شەھىرى، لىن خەييۈن ئۇلارغا ھەمراھ بولۇپ شەھەردىكى چوڭ-كىچىك دۇكان-سارايلارنى ئارىلاپ چىقتى، ئاندىن ئۇلار ئۇنى تارتىپ كىنو كۆرگىلى ئېلىپ باردى. كىنو ئانچە قىزىق ئەمەس ئىدى، ئۇنىڭدا يېقىندا زېگېرلار بىلەن بولغان جەڭ تەسۋىرلەنگەن ئىدى، بىراق جاپاغا قالغىنى يەنىلا چېن جىكۈن بىلەن ۋەن شيوڭفېي بولۇپ، ئۇلار سىرتتا بىر سائەتتىن ئارتۇق ساقلىدى. باغچا، پىيادىلەر كوچىسى، سودا رايونى ھەمدە ئېلېكترونلۇق ئويۇنچۇقخانىلارنىڭ ھەممىسى ئۇلار بارغان جايغا ئايلاندى. بىردەمدىن كېيىن ئۇلار بىر قەھۋەخانىغا كىرىپ ئارام ئالدى، تەملىك قەھۋەدىن ھۇزۇرلانغاچ، كۆڭۈل سۆزلىرىنى ئىزھار قىلىشتى!
ــ كۆپچىلىكنىڭ بۇنداق ئېچىلىپ-يېيىلىپ پاراڭلىشىشى بەكمۇ تەس، بۈگۈن ئايلانغىلى چىققىنىمىز ھەقىقەتەن بەك ياخشى بولۇپتۇ،ــ دېدى بىر قىزچاق قەھۋە ئوتلىغاچ خۇشال ھالدا.