بەرچىنئاي

بىلدىم

پەرىدە ئەفرۇز

بەلكى سورۇنلاردا كۈلگىنىم راستتۇر،

گۈل كىيگىنىم ، گۈللىگىنىم ، گۈل بولغىنىم راستتۇر ،

كۈيلىگىنىم ، كۆيدۈرگىنىم ، كۈل بولغىنىم راستتۇر ،

ئەمما سىزسىز ھېچكىممەن بىلدىم .

ئون گۈلۈمدىن ئون گۈلۈم ئېچىلدى سۇلدى ،

ياپراقلىرىم سارغىيىپ چېچىلدى سۇلدى ،

ئىشىق دىگەنگە كېپەنلەر پىچىلدى ، سۇلدى ،

ئەسسىز ، سىزسىز ھېچكىم مەن بىلدىم .

بىلدىم قانائەتنىڭ مەنزىلى خۇدا ،

بىلدىم سائادەتنىڭ تۈنلىرى زىيا ،

تۇمۇردا ئىشق دېگەن ئەلەم ئويغانسا ،

بېشىڭغا بالادۇر ، بالادۇر بىلدىم !

بىلدىم ،ئارمانلارنىڭ ئۆمرى ئۇزاقتۇر ،

پايانداز سېلىنغان يوللار تۇزاقتۇر ،

بىلدىم خىيانەتنىڭ يولى چىراقتۇر

بىلدىم بوينۇمدىكى مارجان پىراقتۇر،

بىلدىم ...

بەلكى سورۇنلاردا كۈلگىنىم راستتۇر ،

گۈللىگىنىم گۈل بولغىنىم راستتۇر ،

كۈيلىگىنىم كۈل بولغىنىم راستتۇر ،

ئاسماندا ئاي كەبى تۇل بولغىنىم راستتۇر

سىزسىز ، سىزسىز ، ھېچكىممەن بىلدىم .