http://arslan.yanbilog.comئارسلان يانبىلوگى

ئادەم تەن بىلەن روھتىن تۈزۈلگەن ، ئادەم تىنى ئومۇمەن ئوبىيكتىپ بولۇپ بىز بىر ئادەمنىڭ تىنىنىڭ قانداق ئىكەنلىكىنى ، مۇكەممەل ياكى مۇكەممەل ئەمەسلىكىنى ئاساسەن بىر قاراش بىلەن كۆرىۋالالايمىز ،ۋە شۇنىڭغا ئاساسەن شۇ ئادەمنىڭ تىنىگە باھا بىرەلەيمىز ھەم شۇ كىشىگە شۇنىڭغا مۇناسىپ مۇئامىلىدە بولىمىز . بىر پۇتى مىيىپ كىشىنى كۆرگىنىمىزدە ئالدىراپ پۇتبۇل مۇسابىقىسىنىڭ ، يۈگۈرۈش ھەركىتىنىڭ ۋە شۇنىڭغا ئوخشاش پۇتقا مۇناسىۋەتلىك گەپ-سۆزلەردە بولۇشتىن ئىمكان بار ئۆزىمىزنى توسىمىز . ئېنىقكى بىزگە بۇ بۇيرۇقنى مىڭىمىز يەتكۈزىدۇ . دىمەككى بىر ئادەمنى سىرىتتىن چۈشىنىش ئۇنچە مۇرەككەپ بولمىسا كىرەك ، ھەم شۇنداقلا بىر ئادەمگە شۇ تەنگە قاراپ مۇئامىلە تۇتۇشمۇ ھەم مۇرەككەپ ئەمەس . ھەم شۇنداقلا ئادەم تىنىنىڭ فونكىسيىسى ئومۇمەن تۇراقلىققا ئىگە . تاماقنى قولىمىز بىلەن يەيمىز ، تىنى ساقلا بىر ئادەم بولسا ھەرگىز يادىدا يوق پۇتىدا قوشۇق تۇتۇپ سالمايدۇ . ھېچكىممۇ بوتۇلكىدا سۇ ئىچكەندە ئېزىشىپ قېلىپ بوتۇلكىنىڭ ئاغزىنى كۆزىگە ياكى قۇلىقىغا ئۇزۇتۇپ سالمايدۇ . دىمەك تەن تۇراقلىققا ئىگە ، مۇقىملىققا ئىگە ، ئۆزىلا ئەمەس ئۇنىڭ فونكىسيىسىمۇ ھەم تۇراقلىققا ئىگە . 
ئەمما ئادەم روھى ئىنتايىن بىر مۇرەككەپ بولۇپ بىر ئادەمنىڭ روھىي دۇنياسىنى مۇشۇ بىز ياشاۋاتقان رىئال دۇنيانىڭ مۇرەككەپلىكى بىلەن سېلىشتۇرۇش مۇمكىن . 
ئادەم روھىنى تەتقىق قىلىش روھىيەتشۇناسلىق ۋە پىسخىلوگىيە ، ئىنسانشۇناسلىق ،دىنشۇناسلىق  ئىلاھىيەتشۇناسلىق قاتارلىق مۇناسىۋەتلىك پەنلەرنىڭ ۋەزىپىسى ، بىز بۇ يەردە ئىنسان روھىنى تەتقىق قىلمايمىز ھەم بەلكىم ئۇ توغۇرلۇق تەپسىلىي توختۇلۇشقا قۇربىتىمىز يەتمىسە كىرەك . توققۇز ئايدا ئاپىرىدە بولغان بىر ئىنسان ئۆزىنى ھەم ئۆزىنىڭ روھىنى بەلكىم توققۇز مىڭ يىلدىمۇ تەتقىق قىلىپ بولالماسلىقى مۇمكىن . چۈنكى ئىنسان ئۆزى بىر مۆجىزە ، ئۇنىڭ كۆزى بىر مۆجىزە ، يۈرىكى بىر مۆجىزە ، شۇنداقلا ئۇنىڭ روھى ھەم بىر مۆجىزە  ، ئىنسان ئۆزى پۈتۈنلەي مۆجىزىدىن تۈزۈلگەن  . چۈنكى ئۇ دىگەن ئۇلۇغلۇقتا چىكى يوق بىر سىھرى كۈچنىڭ مۆجىزىسى . شۇنداق تۇرۇپ بەزى كىشىلەرنىڭ ھاۋارايى تۈپەيلى ياققان يامغۇرغا ياقىسىنى تۇتۇپ ، ئۈرۈمچىدە تۆتىنجى ئايدا ياققان قارنى ئاللىقانداق مۆجىزە دەپ ياقا تۇتۇپ كىتىشلىرىگە ‹توۋا › دىمەي تۇرالمايمىز . ‹چىراق تۈۋى قاراڭغۇ › بولار ، ئەمما بىزنىڭ چىرىقىمىزنىڭ تۈۋى قوپقاراڭغۇ ، دەھشەت قاراڭغۇ ، ئالامەت قاراڭغۇ . بولمىسا بىز قانداقمۇ ئۆزىمىزدە  مانا مەن دەپ ئوپئوچۇق تۇرغان مۆجىزىلەرگە نەزەرمۇ سېلىپ قويماستىن دۈمبىسى ئالا بۇلىماچ تۇغۇلۇپ قالغان پاقلانغا قاراپ ‹ ئاللاھنىڭ مۆجىزىسى › دەپ ھەيران –ھەس قېلىشىپ مۆجىزىنىڭ كۇرىسىنى چۈشۈرۈپ مۆجىزە دىسە ‹ ھە › دەپ قويىدىغان بولۇپ قالىمىز .