http://arslan.yanbilog.comئارسلان يانبىلوگى

ئاڭلىسام بوۋاملار ئەينى چاغلاردا يۇرتتا نوچى ئۆتكەن ئادەملەر ئىكەنمىش .شۇلارنى ئويلاپ تۇيۇقسىزلا نوچىلىق ھەققىدە ئويلىنىپ قالدىم . ئۇ چاغلاردا مەھەللىدىكى ناشايان ئىشلارنى توسقانلار ، يىتىمنىڭ بېشىنى سىلىغانلار ، نامەرت بايلارنىڭ ، چىرىك ئەمەلدارلارنىڭ ئەدىپىنى بەرگەنلەر ، چېلىشلاردا ، ئات چېپىش ، ئوغلاق تارتىشلاردا ئۇتۇپ چىققانلار نوچى ئىكەنتۇق . ھەم شۇنداقلارنى ئەل-يۇرىتتىكىلەر پالانى نوچى ، پالانى باتۇر دەپ ئاتىشاتتىكەنتۇق . 
بىزدىغۇ ھازىر ئات مىنىشىكە چىدىغۇدەك كاسىمۇ قالمىغىنى تۇردى . بوۋىلار ئات ئۈستىدە ئولتۇرۇپ نوچى بولسا ھازىرقىلار ئىشخانىدا يۇمشاق ئورۇندۇقتا ئولتۇرۇپ گىمىروي بولۇپ قالىدىكەن . ناشايان ئىشلارنى كۆرسەكمۇ ‹توۋا › دىيىشمۇ ئانچە خوش يېقىپ كەتمەيدۇ . ئەمسە ھازىر كىم نوچى ؟
دادىدىن بالا نوچى . بالىڭىز نىمە دىسە شۇنى قىلىپ بىرىشىڭىز كىرەك ، خوش بولسا خۇشال-خۇرام ئۆتسە ئۇنى ئۆزىنىڭ پىشانىسىنىڭ ئوڭلۇقىدىن ، تەقدىرىدىن كۆرىدۇ . ياخشى كۈن كۆرەلمەي قالسا بارچە گۇناھنى سىزدىن كۆرىدۇ . ئاچچىغىنى كەلتۈرۈپ قويسىڭىز ‹ئۇنداق ئادەم مىنى تاپمىساڭ بولمامتى ؟› دەپلا بىزىرىپ ئولتۇرىدۇ . ئاچچىققا چىدىماي بىرەر تەستەك سېلىپ سالسىڭىز ‹ دادام ئائىلە زوراۋانلىقى قىلدى › دەپ توردا تىللاپ ساقچىخانىغا دىلو مەلۇم قىلىشتىن يانمايدىغانلارمۇ بار . 
پۇقرادىن باشلىق نوچى . سىز ئىشقىلىپ سايلام بىلىتىنى كۆرۈپ باقمىسىڭىزمۇ ئۇ يەنىلا خەلىق سايلىغان باشلىق بولالايدۇ  . ئاچچىغىنى كەلتۈرۈپ قويسىڭىز ‹كىملىكىمنى تازا بىلمەي قاپسەندە › دەپ تۇرۇپ سۈر-ھەيۋە بىلەن تاناۋىڭىزنى تارتىپ ئىككىنجى ئالىيىپ قارىيالماس قىلىپ قويىدۇ . 
ئەردىن خوتۇن نوچى . خوتۇن كىشى بولسىمۇ ياخشى ، پۇلى بار ئەردىن بىرنى تېپىپ تىگىۋالسا بىر كىچىدىلا باي بولۇپ كىتىدۇ . ئەمما لىكىن شۇ بايلىق قېنى بىر يوق بولۇپ قالسۇن ، ئەتىسىلا چاچنى چۇۋۇپ ‹ مەن ساڭا تىگىپ نىمە راھەت كۆردۈم › دەپ سۆزلەۋىرىدۇ . خەقكە دىيەلمەيسىز ، ھەرقانداق ئادەمگە دىسىڭىز ‹ ھەركىشى تۇرۇپ قارا ما ئاداشنىڭ قىلغان قىلىقىنى ...› دەيدۇ . 
ئوقۇتقۇچىدىن ئوقۇغۇچى نوچى . بىز كىچىك چاغدا بەش-ئالتىمىز ئۆستەڭگە سۇغا چۈشكىنى قېچىپ كەتسەك مالىم ۋېلىسپىت بىلەن قوغلاپ ئەكلىپ سىنىپقا سولىۋېلىپ ساۋاقداشلارنىڭ ئالدىدىلا قومۇش سۈپۈرگىنىڭ تايىقىنى چىقىرىپ تاياق سۇنۇپ تۈگىگىچە ئۇرغانتى . تاياقنى يەپ بولۇپ مەكتەپتىن قايتىپ ھېلىقى ئۆستەڭگە يەنە بېرىپ سۇغا چۈشۈپ ئۆيگە پوچى كەتكەنتۇق . ھازىر مالىملار ‹نىمىشقا تاپشۇرۇق ئىشلىمىدىڭ ؟› دەپ قاتتىقراق ۋارقىراپ سالسا ئاتا-ئانىلار ‹بالىمىزغا روھىي بېسىم قىلىپ ئىشتىھاسىنى تۇتۇپ قويدى › دەپ ئەرىز قىلىپ روھىي زىيان تۆلىتىشتىن يانمايدۇ . 
خوجايىندىن ئىشلەمچى نوچى . سىز 20-30يىل تەر ئاقتۇرۇپ ، نەچچە يىقىلپ –قوپۇپ ،نەچچە ۋەيران بولۇپ ئاخىرى بىر ئىگىلىكنى تىكلەيسىز ، ئىشلەمچىلىرىڭىز بىرەر ئايلىق مۇئاشىنى ئالالماي قالسا ‹ پۇل تاپساڭ ئۆزۈڭگە ھىساپ ، نىمەڭگە نوچىلىق قىلىسەن ،پۇل بەرمەيدىكەنسەن خوجايىنلىقىڭنى كۆزۈڭگە كۆرسىتىمەن› دەۋىرىدۇ . ئۇنىڭ بىلەن تەڭ تۇرسىڭىزمۇ خەق سىزنى ئەيىبلەيدۇ ، تەڭ تۇرمىسىڭىزمۇ سىزنى ئەيىبلەيدۇ . 
نام چىقارغانلاردىن نامى يوقلار نوچى . سىز مىڭ بىر جاپادا ئاران بىر ئورنىڭىزنى تىكلەپ كىشىلەرگە تونۇلغۇدەك بولسىڭىز لىنتا چىقارسىڭىز ساختىسىنى بېسىپ تولاپ سېتىۋىرىدۇ ، ‹ئۇنداق قىلماڭلار › دىسىڭىز ‹چۈپەي › دەيدۇ .  ‹ ھە بوپتۇ پۇل تاپالمىغاندىكىن › دەپ ئاددى –ساددا يۈرسىڭىز ‹ ماۋۇنى چولپان دىسەك يۈرۈشى ئاينا › دەيدۇ . ئەگەر ئازراق ئاغرىنىپ قالسىڭىز ‹ بىز قوللاپ كۆتۈرۈپ قويساق نىمىگە ئاغرىنىدىكەن › دەيدۇ .  يا ئۆلەي دەپ ئۆلەلمەيسىز ، يا ياشاي دەپ خاتىرجەم ياشىيالمايسىز . 
يازغۇچىدىن نەشىرىيات نوچى . بىر يازغۇچى دۈم يېتىپ دۈم قوپۇپ ئون يىلدا بىر كىتاپ يازغان بولسا ئۇنى نەشىرگە سۇنۇشقا يەنە مىڭنى پالاقشىيدىغان گەپ . ‹ ماۋۇنى زادى نەشىر قىلامسەن قىلمامسەن ؟› دىسىڭىز ‹ خوش ياقسا ، پايدا ئالغىنى بولسا نەشىر قىلىمەن ، بولمىسا ئۆيۈڭدە نەشىر قىلىۋال › دەۋىرىدۇ . 
قەرىز ئىگىسىدىن قەرىز ئالغۇچى نوچى . كۆزىنى مۆلدۈرلىتىپ ‹ ئاداش ياردەم قىلساڭ ، ئاكا ياردەم قىلسىڭىز › دەپ كىلىدۇ . ‹ساۋاپ بولار ، ئاللاھ يولىدا ياردىمىم بولسۇن › دەپ دىگىنىنى بىرىسىز ، ئەمما قەرىزنى ئېلىپ بولغۇچە خەقكە ‹ بۇلبۇلۇڭ بولاي ، مىھمان قىلاي ، تاماق يەيلى › دەپ ئالالسىڭىزمىغۇ مەيلى ، ‹ يوغان پۇلۇڭ باركەن ، تاپقاندا بىرىمەن ، نوچى بولساڭ بىرنى سالمامسەن › دەپ ئالدىڭىزدا بەزدەك قاراپ تۇرسا يا ‹مانا ئەمسە ›دەپ بىرنى سالالمايسىز ، بەك سالغۇڭىز كىلىپ كەتسە ئۆزىڭىزنىڭ يۈزىگە سالىسىز .