ئانا بالا تورى يانبىلوگ نەشرى

جەمئىيەتتە مەلۇم دەرىجىدە جىنايەت ئۆتكۈزۈش نىسبىتى بولىدۇ. ئاشۇ زەھەرلىك چېكىملىك چەككۈچىلەر ئەگەر زەھەرلىك ‏چېكىملىك بولمىغان بولسا باشقا جىنايەتلەرنى سادىر قىلغان بولاتتى، نەچچە يىللار ئىلگىرى زەھەرلىك چېكىملىك چەككۈچىلەر كۆپىيىپ ‏كەتكەندە كىشىلەر «مىللىتىمىز زەھەرلىك چېكىملىك بىلەن تۈگىشىدىغان بولدى» دەپ قاخشاپ كېتىشكەنىدى. بىراق ئەمدىچۇ؟ ‏ئەمدى ئەيدىز كېسىلى شىددەت بىلەن تارقالغاندا مىللەتنىڭ كەلگۈسىدىن قايغۇرىدىغان ئاشۇ كىشىلەر نەگە كەتتى؟ ئۇلار نېمىشقا ‏قاينىمايدۇ، نېمىشقا داۋراڭ سالمايدۇ؟! ئەلبەتتە بۇنىڭدا سەۋەب بار. بىز ئىككى خىل ئىجتىمائىي ئاپەتنى سېلىشتۇرۇپ باقساقلا بولىدۇ. ‏سوتسىئولوگىيە نۇقتىسىدىن ئېلىپ ئېيتقاندا جەمئىيەتتىكى مەلۇم بىرخىل جىنايەت ئۆتكۈزۈش ھادىسىسىنى جىنايەتنى كەلتۈرۈپ ‏چىقارغۇچى مەلۇم ماددىي ئۇبيېكت ۋە جىنايەتچىنى ئازدۇرغان نەرسىدىن كۆرسەك بولمايدۇ. بۇ پۈتكۈل جەمئىيەتنىڭ مەدەنىيەت ‏سەۋىيىسى، قىممەت قارىشى ۋە كىشىلەرنىڭ مەنىۋىي ساپاسى بىلەن مۇناسىۋەتلىك مەسىلە. ئىنسانىيەت جەمئىيىتى تولۇق ‏مۇكەممەللىككە ئېرىشمىگۈچە جەمئىيەتتە جىنايەت ئۆتكۈزۈش ھادىسىسى تۈگىمەيدۇ. بۇ خىل ھادىسىلەر گاھ بىرخىل ئۇسسۇل بىلەن ‏ئىپادىلىنىپ چىقسا، گاھ يەنە بىرخىل ئۇسسۇل بىلەن ئىپادىلىنىپ چىقىدۇ. ئاشۇ خىروئىن چەككۈچىلەر جەمئىيەتتىكى جىنايەت ‏ئۆتكۈزگۈچىلەر توپى بولۇپ، ئەگەر خىروئىن بولمىغان بولسا ئۇلار باشقا جىنايەتلەرنى سادىر قىلغان بولاتتى. مېنىڭچە ئۇلارنىڭ جىنايەت ‏ئۆتكۈزۈشىدىكى سەۋەب خىروئىننىڭ جەلپ قىلىش كۈچىدىنلا ئەمەس بەلكى ئۇلارنىڭ ئىنسانىي ساپاسىنىڭ تۆۋەنلىكى، ئەخلاق ‏قارىشىنىڭ يوقلىقى ۋە مەدەنىيەتسىزلىكىدىن. ئەگەر خىروئىن بولمىسىمۇ ئۇلاردىكى ناچار پىسىخىكا، قالاقلىق، مەدەنىيەتسىزلىك ۋە ‏ئەخلاق قارىشىنىڭ مۇكەممەل بولماسلىقى ئۇلارنى باشقا جىنايەتلەرگە باشلاۋەرگەن بولاتتى. مەيلى جىنايەتنىڭ مەنبەسى نېمە ‏بولۇشىدىن قەتئىينەزەر زەھەرلىك چېكىملىك چەككەچىلەرنىڭ ئەڭ مۇھىم ئاقىۋىتى ئۆزىنى ۋەيران قىلىشتىن ئىبارەت. ئۇ زەھەرلىك ‏چېكىملىك چېكىش ئېھتىياجى ئۈچۈن ئەتراپتىكى كىشىلەرنىڭ مال-مۆلۈككە دەخلى-تەرۇز قىلىدۇ، جەمئىيەتتە مەلۇم دەرىجىدە ناچار ‏تەسىر پەيدا قىلىدۇ، بىراق ئەڭ ئاخىرىقى ھالاكەت زەھەر چەككۈچىنىڭ ئۆزىگە بولىدۇ. مانا بۇ زەھەرلىك چېكىملىك چېكىش ئاپىتى ‏بىلەن ئەيدىز كېسىلىنىڭ ئوخشىمايدىغان تەرىپى. ئەيدىز كېسىلى تارقىلىشچانلىققا ئىگە. ئۇ پۈتكۈل جەمئىيەتتىكى كىشىلەرنىڭ ھاياتى ‏بىلەن مۇناسىۋەتلىك. خىروئىن چېكىدىغانلار ئۆزىنىڭ قانداق ئىش قىلىۋاتقانلىقىنى بىلىپ تۇرۇپ چېكىدۇ. بىراق ئەيدىز كېسىلىگە ‏گىرىپتار بولغانلار ئۇنداق بولىشى ناتايىن. ‏

مەسىلەن: ‏xx‏ ئەر، 43 ياش، سودا قىلىش ئۈچۈن ئۈرۈمچىگە كەلگەن تىجارىتى خېلى ياخشى بولۇپ، پۇل تاپقاندىن كېيىن ئۇيۇن-‏تاماشاغا قاتتىق بېرىلگەن. بىر نەچچە قېتىم رېستۇرانلارغا، قاۋاقخانىلارغا بېرىپ ئۆزىنى ئالىي مەكتەپتە ئوقۇيمىز دەۋالغان قىزلار بىلەن ‏تونۇشۇپ قېلىپ، ئۇلارنى ئۈرۈمچىدە ئىجارىگە ئېلىپ ئولتۇرۇۋاتقان ئۆيىگە ئېلىپ كېتىپ بىللە ياتقان. كېيىن ئائىلىسىگە قايتىپ ‏بارغاندا ئېغىر زۇكام بولۇپ دوختۇرخانىغا كېسەل كۆرسەتكىلى كىرگەندە قان تەكشۈرۈش نەتىجىسىدە ئەيدىز كېسىلىگە گىرىپتار ‏بولغانلىقى بايقالغان. ئۇنىڭ ئەيدىز كېسىلىگە گىرىپتار بولۇشى ئەلۋەتتە ئۇنىڭ ئەخلاقسىزلىقى ۋە يىرگىنىچلىك جىنايىتىنىڭ جازاسى. ‏بىراق كىشىنى قاتتىق ئېچىندۇرىدىغىنى شۇكى ئۇنىڭ كۈندە بەش ۋاق ناماز ئوقۇيدىغان، ئۇيغۇر مىللىتىنىڭ تىپىك ئەخلاق ئەنئەنىسىگە ‏پۈتۈن ۋۇجۇدى بىلەن ۋارىسلىق قىلغان، ئاقكۆڭۈل، ساددا، ئائىلە ۋە بالىسىدىن باشقىنى ئويلىمايدىغان بىچارە ئايالى ‏xx‏ نىڭمۇ ‏ئەيدىز كېسىلىنى يۇقتۇرۇۋالغانلىقى بولۇپ، بۇنىڭغا بىز نېمىمۇ دېيەلەيمىز؟

ئەيدىز كېسىلىنىڭ ئاقىۋىتىنى زەھەر چېكىش ۋە باشقا جىنايەتلەرگە ئوخشاتقىلى بولمايدۇ. چۈنكى بۇ كېسەل پەقەت ‏جەمئىيەتتىكى ئەسلىدىلا جىنايەت يولىغا مېڭىش پسىخىكىسىنى ھازىرلىغان كىشىلەر بىلەنلا تۈگىشى ناتايىن. ئۇ نۆۋەتتە پۈتۈن ‏مىللەتنىڭ بولۇپمۇ بىزدەك مەدەنىيىتى قالاق، پەن-تېخنىكىدا ئارقىدا قالغان بىر مىللەتنىڭ مەۋجۇتلۇقىغا بىراسىتە تەھدىد بولۇپ ‏قالماقتا. بىراق بىز بۇ ئاپەتنى بۇ تەھدىتنى تېخى تونۇپ يېتەلمىدۇق. ئۇيغۇرلار ئىچىدە خىروئىن ۋە زەھەرلىك چېكىملىك چېكىش ‏دېگەنلەردىن نۇرغۇن كىشىلەرنىڭ خەۋىرى بار. بىراق ئەيدىز دېگەننى بىلىدىغانلار قانچىلىك؟ يېقىندا مەلۇم بىر سەھىيە تەشكىلاتىنىڭ ‏ئۈرۈمچى، ئاقسۇ ۋە قەشقەرلەردە سىتاستىكا ئېلىپ بېرىشىغا قارىغاندا «ئەيدىز كېسىلى» دېگەن سۆزنى ئاڭلاپ باققان كىشىلەر 10 ‏پىرسەنتكىمۇ يەتمەيدىكەن. ئەيدىز كېسىلىنىڭ نېمە ئىكەنلىكىنى بىلىدىغان كىشىلەر بولسا پىرسەنتكىمۇ توشمىغان، بۇنداق ئەھۋالدا ‏ئەيدىز كېسىلىنىڭ ئېلىپ كېلىدىغان ئاقىۋىتى تېخىمۇ قورقۇنچلۇق، تارقىلىشى تېخىمۇ شىددەتلىك بولىدۇ. بۇنىڭ ئۈچۈن ئەڭ مۇھىمى ‏يەنىلا تەشۋىقات ئارقىلىق خەلقىمىزگە بۇ دەھشەتلىك ئاپەتنى تونۇتمىسا بولمايدۇ.‏

پۈتۈن مىللەتنىڭ ھاياتىغا تەھدىت سېلىۋاتقان بۇ زور ئاپەتتىن نېمىشقا خەلقىمىز تولۇق خەۋەر تاپالمايدۇ؟ چۈنكى بۇ بىرخىل ‏جىنسىي كېسەللىك بولۇپ، مىللىتىمىز جىنسىيەت ھەققىدىكى تونۇشى ساغلام بولمىغانلىقى تۈپەيلىدىن، جىنسىيەت ھەققىدىكى بىلىملەر ‏ئومۇملاشمىغاچقا شۇنداق بولىۋاتىدۇ. بۇنداق ئەھۋال داۋاملىشىۋەرسە ئاقىۋىتىنى تەسەۋۋۇر قىلغىلى بولمايدۇ.‏

ئەيدىز كېسىلى ھازىر ئەڭ تېز تارقىلىۋاتقان جايلار ئاسىيا، ئافرىقىدىكى قالاق ۋە نامرات دۆلەتلەر بولۇپ، مەدەنىيىتى تەرەققىي ‏قىلغان ئامېرىكا ۋە ياۋرۇپالاردا بولسا خېلىلا تىزگىنلەندى. 92-،93- يىللاردىن باشلاپ ئامېرىكا ۋە ياۋرۇپالارنىڭ ئەيدىز كېسىلىگە ‏گىرىپتار بولۇش نىسبىتى تا ھازىرغىچە ئوخشاش نىسبەتتە بولۇپ، شىددەت بىلەن كېڭىيىشى ئاللىقاچان تىزگىنلەندى دېگەن گەپ. ‏غەرب دۆلەتلىرىنىڭ بۇ كېسەلنى مەلۇم دائىرىدە تىزگىنلىيەلىشى دەل ئۇلاردىكى مەدەنىيەت ۋە ئەخلاق قارىشىنىڭ يۇقىرىلىقىدا. ئافرىقا ‏ۋە شەرق ئەللىرىدە ئەيدىز كېسىلىنىڭ تىزگىنسىز ھالدا شىددەت بىلەن تارقىلىشى دەل ئۇلاردىكى سىرتقى قىياپىتىدە ئىنتايىن ئەخلاقلىق ‏قىياپەتقە كىرىۋېلىش بىراق ئەمەلىيەتتە بۇزۇقچىلىققا قاتتىق بېرىلىش سەۋەبىدىن بولغان. غەرپتە جىنسىيەت شەرق ئەللىرىنىڭكىدەك ‏سىرلىق تېما ئەمەس. جىنسىيەت ھەققىدە مۇھاكىمىلەر ئوچۇق ئاشكارا ئېلىپ بېرىلىۋېرىدۇ. جىنسىيەت ھەققىدە توختىلىش ئەخلاقسىزلىق ‏ئەمەس، پەقەت قالايمىقان جىنسىي پائالىيەتلەرلا ئەخلاقسىزلىق بولۇپ ھېسابلىنىدۇ. يۇشۇرۇن ھالدا قىلىنغان سانسىز بۇزۇقچىلىقلار بولسا ‏سىرتقى قىياپەتتىكى ساختا ئەخلاق كۆرىنىشى كەينىدە يوشۇرۇنۇپ تۇرىۋېرىدۇ. خىلمۇ-خىل بىنورمال جىنسىي پىسخىكىدىكى كىشىلەر ‏غەرپتە بولغاندەك شەرقتىمۇ بار. ئوخشاش جىنىسلىقلارنىڭ مۇھەببەتلىشىشى شەرق ئەللىرىدە غەربتىن قېلىشمايدۇ. غەرپتە بۇلار ئوچۇق ‏ئاشكارا تەتقىق قىلىنىدۇ. بۇ ھەقتە ئەركىن ھالدا توختالغىلى، بەس-مۇنازىرە ئېلىپ بارغىلى بولىدۇ. دەل جەمئىيەتتە بۇ ھەقتىكى ‏غۇلغۇلىلار ئوچۇق-ئاشكارا بولغاچقا بىزگە خۇددى جىنسىي بىنورماللىق پەقەت غەرپتىلا باردەك تۇيۇلۇپ، شەرق ئەللىرىدە بۇ نەرسىلەر ‏يوشۇرۇپ قېلىنغانلىقى ئۈچۈنلا خۇددى مەۋجۇت ئەمەستەك تۇيغۇ بەرگەن ئىدى. ئەلۋەتتە مەلۇم ھادىسە ھەققىدە ئەركىن پىكىر ‏قىلماسلىق ۋە توختالماسلىق يەنى كۆزىنى يۇمىۋېلىش ئۇسۇلى بىلەن ئۇ نەرسىنىڭ مەۋجۇتلىقىنى ئىنكار قىلىشقا تىرىشىش ئەمەلىيەتتە ‏ناھايىتى بىمەنە ۋە ئۈنۈمسىز ئۇسۇل بولۇپ، ئاغرىقنى ھەر قانچە يوشۇرغان بىلەن ئۆلۈم ھامان ئاشكارا.‏

مانا بۈگۈنكى كۈندە ئەيدىز كېسىلىدەك قورقۇنچلۇق ئاپەت تارقىلىۋىدى، ئەمدى بىز جىنسىيەت ھەققىدە توختىلىش، ئۇنى ‏تەتقىق قىلىش، جەمئىيەتتىكى بىنورمال جىنسىي ھادىسىلەرنى ئىپادىلەپ بېرىشنى ئەخلاقسىزلىق دەپ قارايدىغان خاتا ۋە بىر تەرەپلىمە ‏ئىدىيەسىنىڭ زىيىنىنى ئاشكارا تارتىدىغان بولدۇق.‏

بىز ئەتراپىمىزدىكى كىشىلەرگە قارىساق خۇددى بۇ ئالەمدە ئەرلەر بىلەن ئاياللار ئوتتۇرىسىدىكى جىنسىي ئالاقىدىن باشقا ئىش ‏يوقتەك، ھەممە ئەر-ئاياللار پەقەت ئاشۇ ئىشلار ئۈچۈنلا كۈنىنى ئۆتكۈزۈۋاتقاندەك ياشاۋاتقانلىقىنى بايقىماي قالمايمىز. بۇ بىزنىڭ ‏ئالدىمىزدىكى رېئاللىق. ئۇيغۇرلار بىر يەردە سورۇن تۈزىسىلا گەپ ئاشۇ تېمىدا بارىدۇ. باشقا تېمىدىكى ھەر قانداق گېپىڭىز سورۇننى ‏قىزىتالمايدۇ. ئەر-ئاياللار بىر-بىرى بىلەن تونۇشۇپلا قالسا بىر-بىرىنىڭ كويىدا يۈرۈيدۇ. ئەرلەر ئۆزلىرىنىڭ قانچىلىك ئايال بىلەن ‏بۇزۇقچىلىق قىلغىنىدىن پەخىرلىنىپ، سورۇنلاردا داۋراڭ سالىدۇ. بىراق ئادەم ھاڭ-تاڭ قالىدىغان يېرى شۇكى سىز جىنسىيەت ھەققىدە ‏مەتبۇئاتلاردا بىر نەرسە دەپلا سالسىڭىز ھەممە ئادەم يېغىرلىرىغا تۇز سەپكەندەك بولمايلا قاقشاپ كېتىدۇ. ئاشۇنداق ھەرىكىتى بىلەن ‏گېپى ئوخشىمايدىغان، قىياپىتىدە ئەخلاقلىق ئەمەلىيەتتە جىنسىي قىلمىشلار ئۈچۈن جېنىنى پىدا قىلىۋېتىدىغان ساختا ئەخلاقچىلارنىڭ ‏توسالغۇسى تۈپەيلىدىن مىللىتىمىز جىنسىي ھالەتنىڭ بالا قازاسىغا ئۇچرىماقتا.‏

ئۇيغۇرلاردىمۇ خۇددى دۇنيادىكى تەرەققىي قىلغان مىللەتلەرگە ئوخشاشلا جىنسىيەت ھەققىدە تەتقىقاتلار بولۇشى كېرەك ئىدى. ‏بىراق قالاقلىق ۋە مۇتەئەسسىپلىك تۈپەيلىدىن بۇ بىر چەكلەنگەن تېما بولۇپ قالدى. مەن پىسخىك نورمالسىزلىقتىن ئىبارەت بۇ تېمىدا ‏چوڭقۇرراق ئىزدىنىش كېرەكلىكىنى ھېس قىلىپ بىر نەچچە قېتىم شىنجاڭنىڭ ھەرقايسى جايلىرىغا بېرىپ تەكشۈرۈشلەرنى ئېلىپ باردىم. ‏جىنسىيەتكە دائىر مەسىلىلەر بىلەن بىۋاسىتە ئۇچرىشىش مېنى زور ماتېرىياللار ۋە بايقاشلارغا ئىگە قىلدى. شۇڭا مەن بۇ مەسىلىنى تەتقىق ‏قىلىشنىڭ ئىنتايىن زۆرۈر ئىكەنلىكىنى ھەمدە بۇنىڭ ئىنتايىن زۆرۈر ئىكەنلىكىنى، مىللىتىمىز ئۈچۈن ئىنتايىن مۇھىم ئىكەنلىكىنى قاتتىق ‏چۆچۈش ئىچىدە ھېس قىلىپ يەتتۇق. چۈنكى بىز ئىلگىرى جىنسىي ئاڭدىكى قالاقلىق ۋە جاھالەتنىڭ مىللىتىمىزگە زادى قانچىلىق ‏دەرىجىدە ئاپەت ئېلىپ كېلىدىغانلىقىنى تەسەۋۋۇرمۇ قىلىپ يەتمىگەنىدۇق.‏

دەۋر ئۇچقاندەق تەرەققىي قىلىپ ئۆزگىرىپ بارماقتا. مەن پسىخىلوگىيە پېنىنى تەتقىق قىلىۋاتقىنىمغا ئون بەش يىل بوپتۇ، بۇ ‏جەرياندا مەن روھىي كېسەللىك ۋە بىنورمال جىنسىي پسىخىكىنى بەكراق بېرىلىپ تەتقىق قىلدىم. چۈنكى بۇنداق قىلغاندا پۈتۈن ‏ئىنسانىيەتنىڭ تارىخىتىن بېرى تارتىپ كېلىۋاتقان ئازابلىرىنىڭ ماھىيىتى ۋە نىگىزىنى چۈشىنىشكە بولىدۇ دەپ ئويلىغانىدىم. مانا بۇ ‏جەرياندا ئىنسانىيەت ئۈچۈن دۇنيادا ئەڭ مۇھىم نەرسىنىڭ روھىي ساغلاملىق ئىكەنلىكىنى، دۇنيادىكى ئادەملەر كەلتۈرۈپ چىقارغان ‏ئىرقىي توقۇنۇش، جىنسىي كېسەل، ئۈلۈۋېلىش، قاتىللىق، زوراۋانلىق قاتارلىق ئاپەتلەرنىڭ ھەممىسىنىڭ ئادەملەرنىڭ روھىدىكى ‏كەمتۈكلۈك ۋە ساغلام بولمىغانلىقتىن بولغانلىقىنى تونۇپ يەتتىم. ئىنسانىيەت روھىي جەھەتتە مۇكەممەل ۋە ساغلام بولسا ئەلۋەتتە ‏ئىنسانىيەت دۇنياسى چەكسىز گۈزەل بىر جەننەتكە ئايلىنىدۇ. ئىنسانىيەت روھىي جەھەتتە قانچە ساغلام بولمىسا بۇ دۇنيا دەرت-‏ھەسرەت ۋە بالايى ئاپەتكە تولغان قورقۇنچلۇق دوزاققا ئايلىنىدۇ. شۇنىڭ ئۈچۈن مەن ئىنسانىيەتنىڭ روھىي ساغلاملىقى ئۈچۈن ئېلىپ ‏بېرىلغان تەتقىقاتلارنى ئىنتايىن مۇھىم دەپ ئويلايمەن. بىراق ئۇيغۇرلاردا بۇ ھەقتىكى تەتقىقات يوق دېيەرلىك. جىنسىي بىنورماللىق ۋە ‏پسىخىكىلىق ئانالىز ھەققىدە نەشر قىلىنغان، دۇنيانىڭ بۇ ھەقتىكى ئەڭ يېڭى نەتىجىلىرىنى ئۇيغۇرلارغا تونۇشتۇرغان بىرەر كىتابنى ‏تاپقىلى بولمايدۇ. ئۇيغۇرلار خۇددى جىنسىيەت ھەققىدە ھېچقانداق مەسىلە يوقتەك قىياپەتكە كىرىۋالغان، لېكىن مەخسۇس جىنسىي ‏كېسەللىكنى داۋالايدىغان دوختۇرخانىلار تېزلىكتە قۇرۇلۇپ، بۇ قىسقىغىنە نەچچە يىلدىن بېرى، كېڭىيىپ يامراپ كەتتى. ھازىر بۇ ‏دوختۇرخانىلارنىڭ ئالدىدا بىز نۇرغۇنلىغان دەرتمەن ئەر-ئاياللارنىڭ توپ توپى بىلەن تۇرغانلىقىنى كۆرىمىز. ئۇلار دەل مانا مۇشۇ ‏جىنسىيەت بىلەن مۇناسىۋەتلىك كېسەللىكلەر تۈپەيلىدىن ھاياتىدىن تويۇپ كەتكەن، دۇنيادىن پۈتۈنلەي ئۈمىدىنى ئۈزگەن ‏بىمارلاردۇر. بىنورمال جىنسىي پىسىخىكىسىنىڭ توسالغۇسى تۈپەيلىدىن جىنسىي ئىقتىدارى ئاجىزلىغان، بالا يۈزى كۆرەلمىگەن نۇرغۇن ‏بىمارلارنىڭ كۆز ياشلىرى ئادەمنى يۈرىكىنى مۇجىيدۇ؛ يۇقۇملۇق جىنسىي كېسەللىك سەۋەبىدىن ۋەھىمە ۋە قورقۇنچقا چۈشكەن، ‏چىرايىدىن ئۈمىدسىزلىك ۋە سۇلغۇنلۇق چىقىپ تۇرغان بىمارلار ئادەمنى ھەم يىرگەندۈرىدۇ ھەم ئىچنى ئاغرىتىدۇ. مەلۇم بىر جىنسىي ‏كېسەللىكلەر ئامبۇلاتورىيەسىنىڭ مۇدىرى ئامبۇلاتورىيەگە كەلگەن 2000 پارچىدىن ئارتۇق خەتنى مېنىڭ مەخپىيەتلىكنى ساقلىغان ‏ھالدا تەتقىقات ئۈچۈن كۆرۈپ بېقىشىمغا بەرگەنىدى. ئاشۇ خەتلەردىكى بىمارلارنىڭ ئېچىنىشلىق بايانلىرى كۆڭلۈمنى ئىنتايىن بىئارام ‏قىلدى. نۇرغۇنلىغان بىمارلار ئەمەلىيەتتە ساپ-ساق كىشىلەر، ئۇلارنى فىزىئولوگىيەلىك تەكشۈرۈش نەتىجىسىدە ھېچقانداق كېسەل ‏بايقالمىغان. ئۇلار ساپ-ساق تۇرۇپ نېمىشقا ھاياتىنىڭ مۇھىم لەززىتى بولغان جىنسىي لەززەت ۋە پەرزەنت قالدۇرۇش لەززىتىدىن ‏بەھرىمەن بولالماي ئۆمرىنى ھەسرەت ۋە قان-يىرىڭ ئىچىدە ئۆتكۈزىدۇ. نېمە ئۈچۈن نۇرغۇنلىغان بىمارلار ساپ-ساق تۇرۇپ دېگىلى ‏بولمايدىغان ئازابلاردىن ئىچىدە تىنىپ ئۆتۈپ كېتىدۇ؟ بۇ مىللىتىمىزدىكى جىنسىيەتنى سىرلىق تۇتۇش، توغرا چۈشەنمەسلىق ۋە ‏تەتقىقاتلارنى ئېلىپ بارماسلىقنىڭ سەۋەبىدىن كېلىپ چىققان جىنسىي ھالەتنىڭ نەتىجىسى بولۇپ، مىللىتىمىز ئارىسىدا بىر قېتىملىق زور ‏جىنسىي ئاقارتىش ھەرىكىتى ئېلىپ بېرىشنىڭ زۆرۈرلىكىنى ھېس قىلماي قالمايمىز. لېكىن بەزى بىر جاھالەتپەرەس كىشىلەر ھەدەپ ساختا ‏مىللىي ئەخلاق ئويدۇرۇپ چىقىپ، جىنسىيەت ھەققىدە گەپ قىلىش مىللىي ئەخلاققا ئۇيغۇن ئەمەس دېگەندەك بىمەنە گەپلەرنى ‏كۆتۈرۈپ چىقىپ بۇ ھەقتە ئېغىز ئاچقان قەلەمكەشلىرىمىزنىڭ ياقىسىغا ئېسىلىۋاتىدۇ. «قابۇسنامە»، «دەستۇرۇل ئېلاج» دېگەن ‏كىتابلاردىمۇ جىنسىيەت ھەققىدە خېلى چۇڭقۇر ساۋادلار بارغۇ! ئەمدى بۈگۈنكى كۈنگە كەلگەندە نېمىشقا جىنسىيەت ھەققىدە گەپ قىلىش ‏جىنايەت بولۇپ قالدى؟ جىنسىيەت ھەققىدىكى تەتقىقاتنى پەقەت ناچار تەبىئەتلىك پىسىخىكىسى بىنورمال ئادەملەرلا ئەخلاقسىزلىق ‏ھېسابلاپ، ئۇنىڭدىن باشقىچە مەنالارنى چىقىرىپ ھوزۇرلىنىدۇ. كېسەل ھەققىدە گەپ قىلىۋاتسا ئۇنىڭدىن شەھۋانىيلىق ھېس قىلالىغان ‏ئادەمنى قانداقمۇ ساغلام ئەقىل ۋە ئىنسانىي پەزىلەتكە ئىگە ئادەم دىگىلى بولسۇن؟ مىللىتمىزنىڭ مەدەنىيەت سەۋىيەسىنى كۆتۈرۈش ‏بىزنىڭ بۇرچىمىز. جىنسىيەت ھەققىدە توختىلىش ئىلگىرى بۇرژۇئازىيەنىڭ چرىك ئىدىىيەسى دەپ قارىلىپ قاتتىق چەكلەنگەن ئىدى. ‏بۈگۈنكى دەۋردىمۇ بىر قىسىم زىيالى قىياپىتىگە كىرىۋالغان جاھالەتپەرەسلەر ھەدەپ مۇشۇ ئىدىيەگە ئېسىلىۋېلىپ، پەقەت بۇنىڭدىكى ‏ئاتالغۇلارنىلا ئۆزگەرتىپ قويۇپ يېڭى دەۋردىكى جىياڭ چىڭلارغا ئايلانماقتا. جىياڭ چىڭنىڭ ۋەتەنپەرۋەرلىكىنىڭ يالغانلىقى كېيىن ‏ئۇلار ئاغدۇرۇلغاندىن كېيىن ئىسپاتلاندى. ئەينى چاغدا جىياڭ چىڭ ھەممە نەرسىنى غەرپ بۇرژۇئازىيىسىنىڭ دەپ چەكلىگەندە ئۆز ‏خەلقىگە چەكسىز ئاپەتلەرنى ئېلىپ كەلگەن. شۇنىڭدەك بۈگۈنكى ئۇيغۇر جىياڭ چىڭلىرىنىڭ مىللەتپەرۋەرلىكىنىڭ يالغانلىقىمۇ ھامان ‏ئاشكارىلىنىدۇ. ‏

مەنبە: ئىجادىيەت مۇنبىرى

ئاپتۇرى:پەرھات تۇرسۇن 

2009-5-19